Isai 1

¹ Amôza sawchapawpa Isai ta Zudah sahlao bei Uziah zy, Zawtha zy, Ahaza zy, Hezekiah zy abei nota Zudah sahlao nata Zerusale kyh liata aluahna a hmôpa cha.

² Hy avâzy saih u, nahthlie ula, hy leilô nah pachôh teh; ABEIPA chata bi a reih na; “Sawzy a kukheipa ta palaiseih na ta, ei chô liata aty haw tlôh ei ta.

³ Viahchao tôhpa ta a hneituhpa pahno ta, alâ chhaota a puhpa laopiena pahno hra ta; Izarel sahlao deikua chata pahno tlôh leipa ei ta, ei chyhsazy chata pachâ hra veih ei,” tahpa ta.

⁴ A! phopi moleipa, hmoparaona a hri ngaitapa a phaohpa chyhsa zy, hmo moleina a taotuhpa chi zy, a chhie ngaitapa ta a taopa sawzy ama châ! ABEIPA cha siesai ei ta, Izarel sahlao Mo Pathaihpa cha nawhtaw ei ta, a pananopa ta hnôh lâ amâ sy haw.

⁵ Khazia aty via rilipa ta hriepa ta khâ nama y tly? Luh cha a pôhpa duata pasa ta, pathipalôh chhao cha a pôhpa duata a panawh haw.

⁶ Pheipazah tawhta luh tai tlaita tlâhna rai y vei, hmah zy, thidôna zy, hnia a khaohpazy sai a châ; chazy cha bie leipa ta, chahry hra leipa ta, sathaw hnia hra veih ei.

⁷ Nama râh cha rohryhrapa ta y ta, nama khihpi zy cha mei ta kâ khai haw ta; nama râh cha khichhaipazy ta nama mohmô liata nie khai ei ta; khichhaipazy paraopa hawhta, roryhrapa ta a y.

⁸ Zaio sawchanônô cha kresahdô liata byureih hawhta, athei sahdô liata chapu hawhta, nata khihpi padôhpa hawhta sisaipa ta y haw ta.

⁹ Pheisaihzy ABEIPA ta a laibâhpa maniah a pahlôhpa leipa khiahtala, Sawdawma hawhna khata y ha aw pi ta, Kawmawra hawhna khata eima y ha aw.

¹⁰ Sawdawma ryureituhpazy saih u, ABEIPA bie he thei teh u! Kawmawra mo saih u, eima Khazohpa pachuna bie lâna heta nama nahkhao pachôh teh u!

¹¹ “Nama atheihna hluh ngaitapazy he, ei châta khâpa a phahnai? ABEIPA ta a tah. Mietahkupa tôhpa raona hlânazy nata pasapa sahroh thawpa thaw chata ei bie haw; viahchao tôhpa zy, mietahkupa tawzy nata mie tôhpa zy, thisaih liata chhao aly va na.

¹² “Ei hmiakô liata aluah awpa ta namâ vy nona heta, ei dôhpachhôh tlyhmia tlypa he ahy e châ hnaw ei?

¹³ Khâpa hrao leipa atheihna zy vaw cheih khao khah u; Khâpa leipa rohpahâhpa cha ei châta pasichhih ngaitapa a châ. Thla thiehpa zy, pahânoh zy, pakhypi liata hrua pakhynazy hmoparaona nata pakhyna rôhnah ngaitapa chhao he chhyh thei khao va na.

¹⁴ Nama thla thiehpazy nata nama daihti hneipa kuzy cha ei palôhrupa chata â hao; ei châta phaohri ngaitapa a châ, mao-oh thei khao va na.

¹⁵ Nama ku nama pazawh tita chhao, nâmo tawhtapa ei mo chahu aw na ta: ei hluhpi thlah nama chhâ tita chhao, nathli khao awh va na; nama kuzy cha thisaih ta bie tlôh ta.

¹⁶ A si ula; pathaipa ta y teh u; ei mohmô tawhta nama hmo moleina taopazy pahlei ula; hmo moleina tao khao khuh vy,

¹⁷ a phana kyh a chu teh u; pachiana siapa tlua ula, pasaipa-ina a taopazy cha bao ula; paw hnei leipazy cha pachha ula, nôhmeizy cha reikhei teh u.

¹⁸ “A vy tua u, pachâ khoh tua ei suh u. ABEIPA ta a tah: nama moleinazy sailaw hawhta saih hra sala, dâhaw hawhta, a ngyuh aw; saidôhpa hawhta saih haw hra sala, mietahkupa hmi hawhta a y aw.

¹⁹ A phapa ta nata rei a ngiahpa ta nama y khiahtala, râh phana he nama nie aw;

²⁰ châhrasala a ngiah leipa ta nama y khiahtala, zaozi ta pahleipadiapa ta nama y aw; ABEIPA pakah chata cha cha a reih haw,” tah ta.

²¹ Kheihta zie ta e khihpi ngâchhihpa cha sihrypa lâta a vaw châ haw tly, pachiana siana ta a biepa a cha tyhpa tlai! Ano liana chata siana y tyh ta, atahmâ deikua chata lianycheituhpa zy tlao ama y haw hih.

²² Na tâkâ cha syu-ie lâta a lie haw ta, na kresawti cha ti pahlaopa a châ haw.

²³ Nâ abeisawzy cha aty hmâhpa, parutuhpazy viasa châ ei ta. Chyhsa to ta hmosaipiepa khoh ei ta, lymâ amâ chadai tyh. Paw hnei leipazy pachia tyh leipa ei ta, nôhmeizy bie ama hnohta tlô beih vei.

²⁴ Chavâta Abeipa, Pheisaihzy ABEIPA, Izarel sahlao Thatlôpa chata: “A, nâ dyuhtuhpazy he papai aw na ta, ei khakhaipazy chô liata phuh ei la aw.

²⁵ Na chô liata ei ku pathla aw na ta, na syu-i cha a siapa ta pahlei awna ta, na thua iechhiepa cha ei pathaisa aw.

²⁶ A hmiatuapa hawhna khata na ryureituhpazy nata na ryhraotuhpazy cha a thaona liata ama ypa hawhna khata ei paysa heih aw. Cha hnôh lâna chata siana khihpi, khihpi ngâchhihpa bipa nama châ aw.”

²⁸ Châhrasala hmoparaopazy nata moleipazy pahleipadiana cha hmaohkha ta y aw ta, ABEIPA a siesaituhpazy chhao pahleipadiapa ta ama y hra aw.

²⁹ Nama oaka thokô kho ngaitapazy cha zakhei aw ei ta; nama sahdô a tlypazy vâna chata noza ngaitapa ta nama y aw.

³⁰ Oaka thokô a hna a uah hawpa, nata sahdô ti a hnei leipa hawhta y tlôh aw eichi ta.

³¹ Chatawhcha thatlôpa cha lâpi hawhta châ ha aw ta, a raihria cha meihli hawhta a châ aw, chatanachata kâ rairieh aw ta, ahy hmah ta pachhai aw veih ei.