1
Ôbadia aluahna hmôpa cha. Abeipa KHAZOHPA chata Edôma kyh liata he tana heta a tah: ABEIPA tawhta bie thei pi ta, phopizy hry liata lyuhchâpa tuapa a châ, “Thyu ula, adyuhna liata ano adyuh awpa ta hria ei suh u!” tahpa ta.
2
Phozy hry liata ei cha pachyh haw, thata mohnaopa na châ haw.
3
Hy nâ lôpanô keipa likawh liata pahrâpa ta, su sâhpa a pahrâtuhpa, “Ahy e, alei liata na pathla aw?” tahpa palôhrupa a phaohtuhpa, na pathipalôh apalaina ta a cha dô haw.
4
Pahmô hawhta a sâh ngaitapa ta a zaw hra la, na bu cha awhsi hry liata tupa rai cha châ hra sala, cha tawhtapa cha ei cha la aw, ABEIPA ta a tah.
5
Na hnohta parutuhpazy, phihmâhpazy zâta a vy ei sala, ama kho zie ta paru aw veih ei ma? Na hnohta kre alyutuhpazy a vy ei sala, kre thokhazy siesai aw veih ei ma? Châhrasala hrao khaipa na châ haw!
6
Esaw, na ryubyh cha hmôpa a châ haw! Na hmo cha la khai ei ta!
7
Na chhâh a châpa sahlao zydua ta cha dôvei ei ta, na râh tawhta cha papua ei ta; chyhsa adyh ngaitapa ta na ylâhpazy khata cha dô ei ta, a cha pahnie haw ei; na viahchhâ a nietuhpazy khata na ry liata khohei chôh ei ta, ano liana chata novâhna rai y vei.
8
Cha noh liana chata Edôma tawhtapa chyhsa sopazy pahleipadiapa ta, Esaw Tlâh tawhtapa novâhna pahleipadia aw va na ma? ABEIPA ta a tah.
9
Hy Tema, nâ chyhsa thatlôpazy cha ama palôh dua aw ta, Esaw Tlâh liata adyuhpa maih cha ama thi khai aw.
10
Na unawhpa Zakaw chô liata na hmoparaona vâta nozana ta chakhu aw ta, chhâzaw ta pahleipadiapa ta na y aw.
11
Hiakha lâ nâ duana noh liata, khichhaipazy ta sôh ama lana noh liata, pho hropa chyhsazy a kuh ochhi liata a ngiapa ta, Zerusale chô liata ama pachao nona khata, nâma chhao âmo hry liata a hlaopa hawhta na ypa kha.
12
Anodeikuacha na unawhpa a rao nota a raona noh cha moh kha la; Zudah sawzy chô liata ama leidia nota aly kha la; riethei no ta a palai ngaitapa ta reih khâ.
13
Ei chyhsazy ama vâchhie nota ama kuh chhikao liata a ngia khâ; ama vâchhie nota ama pasa taonazy moh kha la, ama vâchhie nota ama sôh nata a piahzy chô liata nama kuzy pahnieh hra kha u.
14
A chyhsa thokha a râpazy thie awpa ta lâtlei liata a duah hra kha; riethei no liata a chyhsa laibâhpazy cha patusa khâ.
15
Pho zydua chô liata ABEIPA noh cha a hnia tlôh ta. Na vaw tao hawpa hawhta, na chô liata taopa a châ aw; na taonazie cha na luh chô tlai liata a vaw lie aw.
16
Ei tlâh pathaihpa liata nama do hawpa hawhna khata, pho zydua chata doh tyh tlôh aw ei ta; doh aw ei ta, palâ aw ei ta, a pih leipa hawh tlaita ama y aw.
17
Zaio Tlâh liana deikua chata a râpazy cha y aw ei ta, a pathai aw; chatawhcha Zakaw chhôhkhapazy chata ama ryuto cha ama to aw.
18
Zakaw chhôhkhapazy cha mei châ aw ei ta, Zawsi chhôhkhapazy cha sawphao hawhta châ aw ei ta, âmo hry liata ia aw ei ta, ama kâ patlô aw: Esaw chhôhkhapazy cha laibâhpa rai y aw veih ei; ABEIPA chata tah tlôh ta.
19
Neke chyhsazy chata Esaw Tlâh cha to aw ei ta, Shephelah liata chyhsazy chata Philistina râh ama to aw; Ephrai râh nata Samari râh cha ama to aw, Benzami chata Kilia râh a to aw.
20
Kana mozy hry liata he Izarel pathla seichâna liata a ypa zawpizy heta Zarepha râh taihta to aw ei ta; Sephara râh liata Zerusale mozy seichâna ta a ypazy chata Neke lâ khihpizy cha ama to aw,
21
Pachha awpa ta Zaio Tlâh lâ kiah aw ei ta, Esaw Tlâh cha ryu ama reih ha aw; chatanachata khihnarâh cha ABEIPA eih a châ ha aw.
