Titu 1

¹ Pawla, Khazohpa sei nata Zisu Krista apôstôl cha.

² Cha chhâzaw hrona cha Khazohpa haipa a reih thei leipa chata khizaw y hlâta bie taih ta.

³ Châhrasala ano daihti tlai liana chata a bie cha bietahpa liana chata a palâsa haw. Cha bietapa cha Khazohpa eima Pachhatuhpa biepiepa lymâ hawhta pavaosapa ei châ.

⁴ Titu ngiapâna dopa liata ei saw hmeiseihpa hnohta: Paw Khazohpa nata Krista Zisu eima Pachhatuhpa tawhtapa ngiachhiena nata adyhna y mawh sy.

⁵ He vâna heta Krita liahpahlô liana chata ei cha siesai, hmo pasia bâhpazy cha na pasia lymâ nawpa nata bie ei cha piepa hawhna khata khi to liata machâzy na rao nawpata,

⁶ ahyrai seina hnei leipa lahpinô pakha a hneipa, sawzy Khazohpa bie a ngiapâpa, piepie-aohraona kyh liata seina hnei leipa, ryhpa bie a parao leipa a hneipa ama châ khiahtala.

⁷ Awnanopa hyutuhpa cha Khazohpa sôh a mokhâhtuhpa a châpa vâta seina hnei leipa a châ awpa a châ; chyhsa chhorupa, pathi chhiepa, kresawti pari hmâhpa, chyhsa tu thaipa, a vyuhna puapa karâ-ypa chyhsa a châ awpa châ leipata,

⁸ khichhaipa pasôzie a thaipa, phana a khohpa, palôhrupa dopa, chyhsa siapa, mopathaihpa, a sohsi theipa tlao châ awpa a châ;

⁹ pachuna do ngaitapa kyh liana chata chyhsa a pasyu thei nawpa nata, eituhpazy cha thai lei a pachâsa thei nawpata pachuna lymâ hawhta bie ngâchhihpa cha khâchâ a pyhpa a châ hra awpa a châ.

¹⁰ Ryhpa leipa hawhta a ypa bie a rei chakhypazy nata dôtuhpazy chyhsa hluhpi y tlôh ei ta, Zu sahlao hry liatahpa ama châ via chai;

¹¹ cha sahlao pakah cha chahupa awpa a châ, a vyuhna puapa ama khohpa vâta bie pachu lei awpa pachupata, chyhsazy chhôhkha duata patypamâ tyh tlôh ei ta.

¹² Âmo hry liatahpa âmo hrohsopa pakha tlaita. “Krita liahpahlô liata chyhsazy cha haihthaipa zy, sahrâhpa moleipa zy, thathipa rikawhpa zy ama châ,” tahpata a reipa kha.

¹³ Cha bie pahnopasapa châ â do. Cha vâna chata Zu sahlao phôhpazy nata bie hmeiseihpa aheisai tyhpazy,

¹⁴ biepiepazy cha pachâ leipata, ngiapâna liana chata a dopata ama y thei nawpata pasa kawpata chhorei teh.

¹⁵ Mopathaihpazy chata ato a pathaih tyh, châhrasala chyhsa puapa nata ngiapâ leipazy chata khâpahma a pathaihpa rai y tyh vei; ama palôhrupa nata ama ngiaryna ryh leina chhao a pua haw.

¹⁶ Khazohpa eima pahno tahpata, reih tyh ei ta. Châhrasala pasichhihpa zy, reingia leipa zy, hmophapa to taona kyh liata Khazohpa kho leinazie châ ei ta, ama hmotaopa ta amâ paphasai tyh.;