1 Samuel 2

¹ Hanah chata thlahchhâ ta, reih ta, ABEIPA chôta ei pathipalôh aly ngaita ta; ei tha cha ABEIPA liata palyupalihpa ta a y. Ei khakhaipa zy chôta ei pakah pakawhpa ta y ta, na pachhana liata ei ly ngaita vâta.

² ABEIPA hawhta pathaihpa y veih ei, nâma hawhpa rai y veih ei; eima Khazohpa hawhpa lôpanô rai y hra vei.

³ Cha tlatlu ta a palaipa ta bie reih kha u la, nama pakah tawhta sâlâna bie rai pua kha se; ABEIPA cha sona Khazohpa châ tlôh ta, ano ta hmotaopa zy a siapa ta kho a pathliah tyh.

⁴ Chyhsa thatlôpa libaw zy thlie ta, a chapiapa zy chai cha thatlôna ta saipa ta y ta.

⁵ Rihbie tyhpa zy cha niepa tlua awpa ta hlao ei ta, nodi tyhpa zy cha amâ pahâ haw. Saw leipa chata pasari a sa haw,saw hluhpi a hneipa nô cha thazeipa ta a y.

⁶ ABEIPA chata thie tyh ta, a pahro tyh hra; thla lâ pazusa tyh ta, a kaw chhi tyh.

⁷ ABEIPA chata si pasasa tyh ta, a pahneirôhsa tyh hra; panawhsa tyh ta, a pasasa tyh hra.

⁸ Dolei tawhtapa sipasapa cha pathyu tyh ta, dyhchhiepa cha buhchado tawhta a chalo tyh, Abei sawzy hnohta paysa thei ta, rôhnahna abeidyuchhai ama to thei nawpa ta. Leilô bôna cha ABEIPA eih châ ta, khizaw cha a chô liata pahnie haw tlôh ta.

⁹ A mopathaihpa zy phei cha vaih aw ta; moleipazy deikua cha zohna hry liata chalihsapa ta ama y aw; thatlôna chata ahyhmah ta ngâ tlôh leipa aw ei ta.

¹⁰ ABEIPA a dyuhtuhpa zy cha ama zaokhai aw; avâ tawhta tôkalôpa ta a dyuh aw ta. ABEIPA ta kaoki taihta pachia aw ta; a beipa cha thatlôna pie aw ta, a sathaw thupa ki cha a palyupalih aw, tah ta.

¹¹ Chatanachata Elkanah cha Ramah khih liata a o lâna chata a di haw ta. Hawtipa chata theihthaipa Eli hmiakô liata ABEIPA chakao ta.

¹² Eli sawchapawpa zy cha molei ngaitapa châ ei ta, ABEIPA cha pahno leipa ei ta.

¹³ Zawpi zy liata theihthaipa zy taonazie cha chyhsa ta atheihna ama vaw hlâ nahta sa chho hai nota, theihthaipa chakaotuhpa he sa thaona thuaku, pazaohpa miathôh a hneipa chabapa ta a vy tyh ta,

¹⁴ bei pakah kawhpa tlyma, keli tlyma, ukâ tlyma, beih tlyma chhôh cha za dy ta; cha sa thaona pazaohpa ta a thaopa zydua cha theihthaipa ta la tyh ta. Cha hawhna chata Izarel chyhsa cha liata a vypa zydua tawhtapa cha Shilôh khih liata vaw tao pa tyh ei ta.

¹⁵ Cha tawhna hra chata a thaw cha ama rao hlâta theihthaipa chakaotuhpa cha a vy ta, atheihpa hnohna cha ta, Theihthaipa châta rao awpa sa na pie teh; na sa chhopa cha khoh leipa ta, a heipa a khoh,” tah tyh ta.

¹⁶ Chyhsa chata a hnohta, A thaw cha rao tua sala, cha khai tawhna chata na khona zie ta na la aw, ama vaw tah nahta ano chata, Châ vei, thlai eina pie awpa chi na a châ. Eina pie vei chi khiahtala tha chahra ta ei la aw, tah tyh ta.

¹⁷ Satliapa zy moleina cha ABEIPA mohmô ta thata châ ta, chyhsa zy chata ABEIPA lâta atheihna hlâpa zy cha khâpahrao leipa ta rei pa tlô ei ta.

¹⁸ Samuel cha hawtipa hmahta châ sala lini theihthaipa viahpakao a ky ta ABEIPA hmiakô liata chakao ta.

¹⁹ Cha leipa chhao cha a no ta viahpakao pasihpa ta bie pa ta a kô chareih atheihna hlâ awpa ta a vahpa hnohta a sie nota, kô chareih a phao pa tyh.

²⁰ Eli chata Elkanah nata a lahpinô cha byhnâ awpa ta, ABEIPA chata nama hmohlâpa, nama hlapa he, he chanô pathla heta ABEIPA ta cha thô ei se, tah ta; chatanachata ama o lâ a di haw ei ta.

²¹ ABEIPA chata Hanah cha vaw tly ta, saw phaoh ta, sawchapaw pathôh nata sawchanô pano sa ta. Cha chhôhna chata hawti Samuel cha ABEIPA hmiakô liana chata vaw laiseih haw ta.

²² Eli cha machâ kaw ha ta, Izarel chyhsa zydua chô liata a sawzy hmotaopa zydua nata achhyna poh-o chhikao kiapâh liata chakaotuhpa chanô zy amâ ziakhei tyhpa kyh zy vaw thei ta.

²³ Chatanachata ama hnohta, Khazia he hawhpa hmo nama tao tly? He chyhsa zydua tawhna heta nama hmotaopa pha leipa ei thei.

²⁴ Châ vei, ei sawchapaw zy saih u, nama thâtih ei theipa cha, a pha leina lâ sai a châ, ABEIPA chyhsa zy cha hmo nama paraosa.

²⁵ Chyhsa pakha mo hropa chô liata a molei khiahtala Khazohpa ta pachia pa aw ta; anodeikuacha chyhsa ABEIPA chô liata a molei khiahtala ahy e a hawkhei aw? tah ta. Cha chôna chhao chata ama paw bie cha angiah khoh leipa ei ta; ABEIPA chata âmo cha thie tlai tlôh aw ta.

²⁶ Hawti Samuel cha laiseih rili ta, Khazohpa nata chyhsapa khona zie ta y ta.

²⁷ Eli lâna chata Khazohpa chyhsa pakha a vy ta, a hnohta, “ABEIPA chata he tana heta a tah, ‘Izi râh liata Phirao sei ta, nama y nona khata nama pathlatuhpa zy hnohta a luah va na ma?

²⁸ Izarel pho zydua hry tawhtapa ei maisâh lâ a vypa ta rohpahâhpa raopa ta, ei hmiakô liata theihthaipa viah pakao a kyh awpa ta ei theihthaipa chata ano cha rao va na mâ? Na pathlatuhpa zy cha Izarel chyhsa zy raopa hlâna zydua pie va na ma?

²⁹ Khâpa vâta e, ei yna liata hlâ awpa ta ei raopa, kei lâta atheihna nata kei vyuh châta hmohlâpa cha tly pâpa ta, keima vyuhpa ta na sawzy palyupalih viapa ta nâmo a pathaw nawpa ta ei chyhsa Izarel zy atheihna a phapa maih nama hmâh?’ tahpa ta.

³⁰ Chavâta ABEIPA Izarel zy Khazohpa chata, ‘Kei châta na chhôhkha zy nata na paw chhôhkha zy cha chhâzaw ta ei hmiakô liata nama y aw,’ tah tlai na ta, tah ta. Châhrasala atahmâ he ABEIPA chata, ‘Y chachei ta aw veih eichi, na palyupalihpa maih cha palyupalih aw na ta, na mohnaopa maih cha khâpasawta reih tlôh leipa aw na ta.

³¹ Na bâhzy na paw chhôhkhapa bâh zy ei taina noh cha a vaw tlô aw, na o liata pakhu kâhbipa ta a hropa rai y aw veih ei.

³² Izarel chyhsa zy Khazohpa ta hneirôhna a pie tina chata nâmo ta rietheina chôta uavapa ta moh aw eichi ta; na o liata chhâzaw ta pakhu kâhbiepa ta a hrohpa rai y aw veih ei.

³³ Na chyhsa ei maisâh tawhtapa ei pahlei lei awpa cha na moh, cha paba awpa nata na palôhrupa pachâ châ parôhsa awpa châ aw ta; na o liata a pihpa maih cha amâ khoh locho ta ama thi lymâ aw.

³⁴ He he na sawchapaw pano, Hôphani nata Phineha chô liata hmo a vaw tlô awpa cha na châta pahnona a châ aw; noh kha ta ama pano ta ama thi rairieh aw.

³⁵ Theihthaipa ngâchhih ngaitapa ei châta padua pathi aw na ta, cha chata ei pathipalôh nata ei palôhrupa ryhna zie ta tao aw ta; chhôhkha a i ngaitapa ta padua aw na ta, chhâzaw ta ei sathaw thupa hmiakô liana chata a y aw.

³⁶ Na o liata a ypa zydua cha tâkâ nata viahchhâ hiapa ta sie aw ei ta, a naoh aw ei ta, Viahchhâ a chyhta chhâ niepa ei hmô thei nawpa ta theihthaipa raihria kheihawhpa ma na pahriasa mah y, ama tah aw,’ a tah, tah ta.