Biesozy 1

¹ Izarel beipa Davi sawchapawpa Sawlawmaw bieso reipazy cha:

² Sona nata pachuna pahno theina awpa zy, pahno thaina bie pachâpadyna yzie thaina zy,

³ siana zy, pachiana zy pathlua hlei hnei leipa ta, yzie thai ngaitapa ta pachiana apyh zie thaina zy;

⁴ a ngâpazy lâta so theina pahneisa awpa zy, satliapa zy pahnona nata pachâpady thaina pahneisa awpa nata;

⁵ chyhsa sopazy ta theipa ta ama thaina zy vaw pôhpa ta, hmo pachâ a thaipa chyhsa ta pachiana sopazy a patu thaina awpa zy,

⁶ bieso nata a chhopasiana zy chyhsa sopa bie nata ama bie nyupa reipa zy pahno thaina zy cha.

⁷ Abeipa china he novâhna a thaona châ ta. Ahrupa zy chata sona nata pachuna ama mohnao tyh.

⁸ Ei sawchapawpa y,na paw a cha pachuna cha nahthlie la, na nô bie a cha piepa cha a heisai khâ;

⁹ na luh châta pawpi pachhih a ngia ngaitapa châ aw ta, na rao châta pachhih hawhta châ tlôh aw ta.

¹⁰ Ei saw y, moleipa ta ama cha reipasao khiahtala zyh khâ.

¹¹ Avy teh, thisaih palo awpa ta a byh ei si, a chhâpa y leipa ta athaipa zy cha aru lâta eimâ byh aw.

¹² Sheôl hawhta a hrohpa ta palâ tua ei si; ama pôhpa ta khaotlôpa liata a tlapa hawhta;

¹³ hmo sôh ngaitapazy hnei aw pi ta, hraona sôh ta eima o eima pabie aw;

¹⁴ eima hry liata pachao hra aw chi ta; tâkâ sahria ahly vâ pi, tahpa zy ta ama tah no ta:

¹⁵ ei saw y, ama hry liana chata ahlao hra khah la, ama lâpi tawhtapa a panano teh;

¹⁶ ama pheizy chata hmo moleina lâta a râ ta, thisaih palo awpa ta amâ parah tyh.

¹⁷ Kheihta pavaw mohmô liata sao paraipa cha, khâpa hrao leipa ta paraipa a châ;

¹⁸ he chyhsazy heta âmo thisaih a byh ei ta, ama hrona aru lâta a byhpa ama châ.

¹⁹ Avyuhna liata karâypa maih cha, cha hawhpa cha ama châ, a hneituhpazy hrona a lapa tyh.

²⁰ Othliah liata sona cha a paro ngaitapa ta awh ta; othliah atyhna zy liana chata a ao papua ta;

²¹ zawpi apakhyna chaipa liata awh ta; khihpi liata khih a ngiana ochhi thaby liana chata a biezy reih ta:

²² “Nâmo angâpa saih u, khachâ e ngâna nama pasô aw? Khachâ e mohnaotuhpazy mohnaona liata nama tha pha aw ta,ahrupazy ta novâhna namâ hao aw tly?

²³ Ei cha chhoreina lâna heta a vaw heih teh u,nama hnohta ei chhosiena cha pie aw ei na ta; ei biezy ei cha pahnosa aw ei.

²⁴ Cha aw ei na ta, khoh leipa eichi ta, ei ku pazawh na ta, ahy hmah ta uasa leipa eichi ta,

²⁵ ei ryhraopa zydua cha khâpa hrao leipa ta tlao pachâ eichi ta, ei chhoreina rai a pyh khoh leipa eichi ta,

²⁶ kei chhao nama chhiena noh liana chata pahneih aw na ta; nama china daihti a vaw tlô nona chata ei cha pahneisao aw ei,

²⁷ nama china thlihpi hawhta a vaw tlô nahta nôpona nama chô liata a vaw tlô tita.

²⁸ Cha tina chata na pado aw ei ta,châhrasala a chhy aw va ei na; tiama ngaitapa ta na tlua aw ei ta,châhrasala na hmô aw veih ei.

²⁹ Novâhna cha a hao tlôh ei ta, ABEIPA china cha amâ tlyh leipa vâta,

³⁰ ei ryhraopa miakha hmahta khoh leipa ei ta, ei chhoreina zydua cha apapeisa veih ei,

³¹ chavâta âmo yzie thei cha nie aw ei ta, âmo pachâpadyna ta lôhrâ tlôpa ta ama y aw.

³² Angâpazy hnôh lâ a syna chata âmo thie aw ta, a hrupazy vânohtona ta âmo a pahleipadia aw;

³³ ei bie a pyhpa maih deikua cha a boh ngaitapa ta pahrâ aw ei ta, hmo moleina chi leipa ta ama y molo aw,” tahpa ta.